افتحوا بيوتكم يا جماعة
البيوت دلوقتي ما شاء الله.. افخم تشطيب و فرش.. بس محدش بيزورها.. نجف و سجاد و ستاير و تحف و تابلوهات و أنتيكات.. بس عيد ميلاد الولاد.. لا لا نعمله برة في النادي ولا في المطعم الفلاني..
نعزم صحابنا عالغدا.. لا لا ما صدقنا البيت لسة متنفض.. نعزمهم برة.. ولا نعمل ديش بارتي في اي جنينة..
بقالنا كتير ما شفناش قرايبنا.. بس لا لحسن فلانة عنيها وحشة.. لما جتلنا من خمس سنين.. رف النيش وقع اتدشدش يا ساتر يا رب
طب و بعدين.. حلو ان بيوتكم تبقى نظيفة و شيك.. بس فيه بيوت بسيطة اوي و كرم أصحابها و بساطتهم بتخليك تحب دايما تروح لهم و حابب قعدتهم و بتبقى عارف ان بيتهم دايما مفتوح..
بلاش تقفلوا بيوتكم على نفسكم.. خلي بيوتكم عمرانة دايما.. الضيف بيمشي بيكنس معاه ذنوب أهل البيت.. و لو قلقانين من الحسد.. حصنوا نفسكم بأذكار الصباح والمساء و سورة البقرة..
اللي بيجرب احساس ان بيته يكون دايما مفتوح بيلاقي سعادة والله ما تتوصفش.. البيت اللي محدش بيزوره بيبقى كئيب أوي مهما كانت شياكته و مهما كان مصروف عليه.
افتحوا بيوتكم يا جماعة و ماتخافوش
خلي البركة تملأ بيوتنا زي زمان
دمتم كرماء و بيتكم عامر
