صورة داليا مصطفي وشقيقتها السبب وراء كشف سر مرضها .. ما القصة؟
كتب_جوهر الجمل
ظهرت النجمة داليا مصطفى في فيديو عبر حسابها الرسمي على موقع تبادل الصور والفيديوهات “Instagram” لتتحدث عن صورة تجمعها مع شقيقتها نشرتها مؤخراً، حيث ظهرت في الصورة وهي ترتدي جهاز استشعار يظهر على يديها والذي جعل جمهور السوشيال ميديا يتسائل عن هذا الجهاز وما هو؟.
وكشفت الفنانة داليا مصطفى إصابتها بمرض السكري، موضحة أن هذا الجهاز هو جهاز استشعار خاص بمرض السكري وأنها لا تخجل من هذا الأمر، مؤكدة أنها لا تقوم بالإعلان عنه لكن هذا لزيادة التوعية لدى الناس.
قالت داليا مصطفى خلال الفيديو: “كنت منزلة صورة أنا وأختي وكنت لابسه فيها الجهاز ده “جهاز استشعار” بتاع السكر، ده جهاز السكر عشان في ناس مكنتش فاهمة ده جهاز إيه بالظبط، بعد ما نزلت الصورة وأنا كنت بتصور عادي، أمهات كتير بعتولي وناس منظمة لمعارض وحاجات للسكر شجعوني جدا وانبسطوا أوي إني لابساه ومش مكسوفة، وأمهات قالولي شكرا طلعتي بشكل عادي بالمنظر ده والجهاز ده خلى أولادنا عندهم ثقة أنهم يلبسوه ومش مكسوفين خالص”.
وتابعت: “إحنا يمكن معندناش التوعية دي إن مفيش داعي للتنمر لو في تنمر، أنا شايفه أن الأطفال أو حتى الستات اللي بتبقى مكسوفة تلبس الجهاز ده لو لابسين نص كم، على فكرة مش فارقة مش مهم رأي أي حد فيا أنا مستريحة كده الجهاز ده ريحني جدا، كان سكري قبل كده صعب بيوصل لـ8 ومرضى السكر هيفهموا يعني إيه دي حاجة مش لطيفة، كنت بكره الشكشكة حاجة بتضايقني وكنت سايباها كده وحصل مضاعفات مش لطيفة”.
وأكملت داليا مصطفى: “فجأة روحت لدكتور عظيم قالي في جهاز، وقلتله إني سمعت إنه نزل من كام سنة بس مش في مصر قالي لأ موجود وفعلا ركبته هو جهاز أكتر من هايل بيقيس السكر زي رسم بياني، لما بيكون عالي باخد أنسولين، ولما بيكون واطي بيدني تنبيه فأخذ حاجة، أنا مش بعمل إعلان وبالمناسبة أنا مش عارفة إيه ماركة الجهاز ده أصلا بقولكم وبشجع أي واحدة وطفل أو طفلة عندها سكر أن ميهمهش أي حد، كل واحد مشغول بحاله متفكروش في حاجة وفكروا في نفسكم وبس وربنا يشفينا كلنا”.
يُذكر أن آخر أعمال داليا مصطفى كان مسلسل “علاقة مشروعة” وعرض في رمضان 2023، بطولة ياسر جلال، مى عمر، داليا مصطفى، مراد مكرم، بسنت شوقى، عفاف مصطفى، ياسمين رحمي، وردشان مجدى، وعدد آخر من الفنانين، تأليف سماح الحريرى، إخراج خالد مرعى، إنتاج مشترك بين شركتى “Forever Drama – مها سليم” و”media Hub – سعدى جوهر”.
