بالمختصر المفيد ابن المستشار والمحترم امين الشرطه

من امبارح بنقرا تعليقات بتتكلم عن “الطرمخة” على قضية طفل المرور وامين الشرطه.. والسؤال دلوقتي هل حصل أي نوع من أنواع الطرمخة؟ 

الإجابة، قاطعة لأ..

لإنه من بداية الواقعة تم استدعاء الطفل للنيابة، وتم اتخاذ الإجراءات اللي بينص عليها القانون، اللي ممكن نقول كتير عن ضرورة تعديله أو تغليظه، لكن في النهاية النيابة نفذت القانون..

بعد كده وخلال ساعات، حصلت مستجدات تانية، تم استدعاؤه تاني، هو و4 من صحابه.. 

كانت النتيجة ايه؟ إيداع الطفل دار ملاحظة لمدة أسبوع، وحبس 4 من أصدقاؤه 4 أيام على ذمة التحقيقات.. 

وبالتزامن مع الإجراءات دي، الإعلام بيتكلم، وزارة الداخلية بتكرم أمين الشرطة، نادي القضاة كان له تصريحات بيأكد فيها إنه ضد التجاوز وإن تجاوز نجل أحد القضاة مالوش علاقة بالقضاة كلهم.. 

فين بقى الطرمخة؟ هل احنا مش عاوزين نصدق إن البلد بتتغير فعلا؟ هل الكام قضية اللي حصلوا آخر كام شهر ماكانوش أدلة كافية على إن مفيش حد فوق القانون؟ 

الكلام ده مش معناه إن مفيش تجاوزات، التجاوزات هتفضل موجودة في أي مجتمع بشري، لكن المجتمع لما بيكون صحي بيعاقب المتجاوز، وده اللي حصل.. 

ماتسمعش لحد عاوز يحبطك..