الناس والسد
يكتبها: صلاح هاشم
واقف ليه ع البر التاني
وسايب الدنيا تشيل وتحط
عمال تكتب في الجوابات
وعامل فيها حراجى القط ..!
فاطنه تعبت قوى يا حراجي
فاطنه زهقت م القرايات
وحابه تجيلك عند السد
عايزه تشوف الميه بتجري
عايزه تشوفها بتروي الأرض ..!
ياااه يا حراجي ..
عايز الدنيا تشاركك حلمك
وانت حلمك مالهوش حد ..!
بطل تحلم قوي يا حراجي
بطل تحلم فيها لوحدك
واحلم مره في وسط الناس
اصلى الناس في بلدنا عجيبه
وفاطنه تقول الناس بالناس ..!
خلي الناس يا حراجي في ضهرك
خلي الناس تشاركك حلمك
تسهر جنبك ويا السد
حط لحلمك ألف نهايه
واكتب فيها حراجي القط ..!
لسه بتبعت في الجوابات
وفاكر لسه فاطنه ع تقرا
وممكن لحظه تغيب ع النت
طيب قوي يا حراجي القط ..!
خدنا معاك ع البر التاني
او تعالى لنا وشوف الأرض
دي بقت شبهي وشبهك خالص
نفس سمارنا كده بالظبط ..!
حتى في عز عطشها بتزرع
حتى في عز شقاها بتنتج
شقيانه زيك بالظبط ..!
فاطنه كبرت قوي يا حراجي
لكن لسه زي زمان
عاشقه النيل ..
وعاشقه حراجي ..
وعاشقه السد ..
وانت عجيب يا حراجي القط ..!
لسه بتكتب في الجوابات
وفاكر لسه فاطنه ع تقرا
بعد ما مات الشيخ محمود
وبعد ما دخل النجع النت
طيب قوي يا حراجي القط ..!
