اتعب نفسك شويه واقرأ للأخر.
تعالى بقى عشان اعرف حضرتك وافكرك وارجع بيك ل ٨ سنين ورا
لما حضرتك شاركت في ثورة اشعل فتيلها مجموعة من الشباب، عشان يعزلوا نظام مبارك الفاسد الحرامي
ملحوظة: زعيم الشباب دول خرج في فيديوهات وهو عريان من كام يوم، ندمان وبيعتذر لينا ولمبارك الحرامي!!! لانه كان غلطان
بعد ما الثورة دي حضرتك قلبت لفوضى
اتحرقت فيها اقسام شرطة وسرقات ونهب وتثبيت وتخريب وتبوير لاراضي زراعية وهجوم على المتاحف وسرقة محلات ومظاهرات فئوية ومظاهرات يومية
وياريت كانت فضلت على كده
ده بعد الفوضى دي، جبتولنا عصابة مجرمة وخاينة وقلتولنا دول فصيل وطني شريف،
الفصيل ده حكمنا لمدة سنة
لما الفصيل الوطني ده، ضربكم على قفاكم وقالكم معذره احنا بنثق فقط في اعضاء جماعتنا وكوادرنا وشباب الجماعة
روحتم بنخبكم من البرادعي لحمدين لنافعة لوزارة الدفاع تبكوا عندها
وتهتفوا ” انزل يا سيسي ” خلصنا من الجماعة المجرمة دي
مظبوط ولا انا بكدب وببالغ؟
السيسي قالكم انا مش بتاع انتخة، انا راجل جاي اشتغل وابني ومش حعمل حاجة لوحدي
قولتوله احنا في ظهرك حنساعدك وحنحميك
واستلمها السيسي في يونيو ٢٠١٤، بس استلمها ازاي؟
انا فاكر ساعتها انه راعى مشاعركم ومرضاش يفضحكم وقالكم انه استلمتها شبه دولة،
انما الحقيقة استلمها جيش بس وبلا دولة
انت عارف مصادر دخل البلد من الدولار إيه؟ ولا نسيت… حقولك
قناة السويس، السياحة، تحويلات العاملين بالخارج، الاستثمارات الخارجية والتصدير
دي دخل البلد من الدولارات عشان تستورد اكلك وعلاجك ومعدات مصانعك واسلحة عشان تحمي جنابك
الاحتياطي النقدي من العمولات الاجنبية وقتها كان ١٤ مليار دولار بعد ما كان ٣٦ مليار
يعني البلاد كانت على وشك الافلاس، لولا مساعدات السعودية والامارات واللي وصلت لاكتر من ٤٥ مليار دولار
إيه اللي حصل؟
– اكتر من ٥٠٠٠ مصنع تم اغلاقهم بسبب الاحتجاجات والمظاهرات الفئوية وانقطاع الكهربا وعدم الاستقرار الامني
– السياحة انضربت خاصة بعد حادث الطيارة الروسية
– وتحويلات العاملين بالخارج وصلت لادنى مستوياتها بعد ما الجماعة الارهابية بدأت تاخدهم منهم برة وتمنع تحويلهم لبلادهم
يعني مكنش فاضل غير ايرادات قناة السويس ( ٥٬٥ مليار دولار في السنة) وشوية منتجات خايبة للتصدير
طبعا غير الارهاب اللي كان بيضرب بقوة ع الحدود ويوماتي في الداخل
ده غير الملايين من العمالة اللي رجعت هربانة من ليبيا
عايز افكرك كمان ان الحرامي مبارك افسد ما تبقى من شركات القطاع العام وباع معظمها بتمن بخس، فاصبح الاقتصاد في قبضة عدة عائلات تعد على اصابع اليد الواحدة
معلش انا بحاول اختصر لحضرتك وضع البلاد وقتها
اصل نجيب محفوظ قالها في احدى رواياته، ” آفة حارتنا النسيان ”
مش حفكرك ان منظمة الوحدة الافريقية علقت عضوية احد اهم مؤسسيها، بل ودولة زي جنوب افريقيا هددت بالقبض على رئيس مصر في حالة وصوله لاراضيها
تخيل سعادتك وصلت الاهانة لإيه
وطبعا اثيوبيا شافتها فرصة ذهبية واعلنت البدأ في سد النهضة
ده غير موقف اوباما امريكا اللي رفض صيانة طيارات الاباتشي وارسال طيارات اف ١٦ اللي متعاقد عليها
مش حنتكلم عن مرضى فيرس سي ولا قوائم العمليات المؤجلة وحالة المستشفيات واللاتعليم ولا عن سرطان الفساد اللي ضارب كل ركن من اركان مؤسسات الدولة ولا حنذكر سيادتك بعصبيتك لما الكهربا كانت بتقطع عن واي فاي الراوتر وتمنعك من المعارضة والألش على صفحات الفيسبوك وتويتر
ده باختصار شديد جدا جدا جدا، حالة البلد لما استلمها السيسي
عمل إيه السبسي بقى؟
في فترة رياسته الاولى بدأ العمل في المشاريع العملاقة، اللي بتجذب عمالة كتيرة
فبدأ بحفر قناة السويس وانفاق سينا ومحطات الكهربا والطرق والكباري
ماهو حضرتك المصنع حيشتغل ازاي من غير طاقة وطريق يصرف منتجاته؟
انفاق سينا اللي حتربطها بالوادي وتعمرها وتمنع غزوها
عارف العمارة الواحدة في اي مدينة جديدة او في العاصمة الادارية بتحتاج لإيه؟
بتحتاج لمصنع بلاط ومصنع اسمنت ومصنع حديد ومصنع المونيوم ومصنع خشب ومصنع ادوات كهربة ومصنع اسلاك ومصنع سيراميك ومصنع حنفيات
ولا حضرتك فاكر العمارة بتتزرع وتتروي ونصحى الصبح نلاقيها بقت عمارة!!
وعشان سيادتك كاره للسيسي ومش عايز تعترف بأي انجاز اتحقق
فضلت تردد طوال فترة رئاسته الاولى باولوية بناء الانسان اولا قبل بناء الطرق والكباري
بدأ فترة رئاسته التانية بالتعليم والصحة
اعترضت حضرتك كعادتك على نظام التعليم وحرضت عليه وسفهته رغم انك لا تملك اصلا تعليم
حتى حملة ١٠٠ مليون صحة لمحاربة والقضاء على فيرس سي اعتبرتها انها حملة اجبارية من منظمة الصحة العالمية
وعملت نفسك مش واخد بالك لما تم الاعلان عن بدأ مشروع التأمين الشامل في بورسعيد
كل اللي سبق ده كوم والتشكيك في جيش بلادك كوم تاني خالص
انا عايزك تسأل جوجل واليوتيوب وتقولهم احكولي ازاي بدأوا في تخريب الجيش السوري وعن عمليات انشقاق الظباط والعساكر كانت بتم ازاي في سوريا
الجيش السوري اللي بيعتبر الجيش الاول وفي مصر الجيش التاني والتالت
ده مثال ومنه ابحث اكتر وحتعرف اكتر واكتر
لما اختلفوا اللصوص والمجرمين بتنكشف الحقيقة وازاي فلتت الفريسة سوريا بعد ما تهاوشوا المجرمين مع بعض
نصيحة اخيرة لجنابك
لو انهار جيشك مش حتلاقي مكان تروحه وتلجأ اليه غير البحر
لان حدودك الشرقية مع غزة
والغربية مع ليبيا
والجنوبية مع السودان
والشمالية البحر الابيض المتوسط
جيشك هو وتد الوطن
حافظ عليه واهبش اللي يحاول ينال منه
معلش طولت عليك رغم اني اختصرت ياما
اوعي حد يغفلك وتبيع ولادك ونفسك ووطنك…
