الناس الى بتسافر بعربياتها او طالعة مصايف الوقت الجاي فى مصر , اسمعوا الكلام ده علشان خطير

الناس الى بتسافر بعربياتها او طالعة مصايف الوقت الجاي فى مصر , اسمعوا الكلام ده علشان خطير

اولا : الناس الى بتسافر السخنة و الغردقة و شرم ,حضرتك متعملش ناصح وتسافر باليل, ليه بقى متسافرش بالليل؟
علشان حوادث النوم و انعدام الرؤية حضرتك, مفيش حاجة اسمها نطلع بالليل فى الطراوة علشان نلحق اليوم من اوله, مفيش يوم هتلحقة من اوله حضرتك ، تقوم الصبح بدرى تسافر اوك انما تسافر باليل فا حضرتك معرض انك تنام او عربيات جاية فى وشك سواقها ينام او ييجى واحد سواق نقل ماشى وراك ينام فا يدهسك وده بيحصل كتير

ثانيا : بما انك طالع تصيف فا اكيد مش طالع لوحدك, عربيتك مليانة قدام و ورا , نشغل عقلنا شوية فى قوانين الفيزياء, حمولة عربيتك كبيرة فا الفرملة الى كنت بتدوسها علشان توقف عربيتك وانت لوحدك مختلفة عن الدوسة الى هتدوسها علشان توقف كتلة عربيتك و هي فيها 5, سرعتك متعديش 100 الى 120 علشان لو طلع قدامك حد وفرملت وانت مركب 5 اشخاص مثلا فا الفرامل مش هتلحقك و هتخبط او هتتقلب لا قدر الله, طبعا انا متكلمتش على ان عربيتك حديثة او لا, لو قديمة فا تفوق كدة و تصحصح و تمشى بالراحة.

ثالثا : يفضل تروح على اى بنزينة محترمة و تروح تنيم ال4 كاوتشات على الارض و تنفخ الكواتشات كلها نيتروجين,الموضوع مهم, ليه مهم علشان الهواء الي جوه الكاوتش بيتمدد اثناء السواقة خصوصا على الاسفلت السخن فا الكاوتشات بتضرب و ممكن تتقلب. النيتروجين غاز لا يتمدد فا امان اكتر,

رابعا :حزام الامان الى عندك ده تلبسة و متقلعوش انت والى معاك فى العربية قدام و ورا, ربطك لحزام الامان . بيقلل من حدوث الوفاه جداااا و كمان بيقلل من الاصابات الخطيرة فى حالة الحوادث لا قدر الله

خامسا : لو عربيتك لا تصلح للسفر , متسافرش,من الاخر بيها متبهدلش نفسك.
وظبط عربيتك قبل السفر من سوائل وزيوت وخلافة.ومتنساش طبعا تكشف على تيل الفرامل
تروح تكشف على تيل الفرامل بتاعك قبل السفر , لقيت التيل متاكل غيرة,

سادسا :عوامل التشتيت
مراتك قاعدة جمبك, خطيبتك قاعدة جمبك, امك ابوك اخوك اختك ابنك قاعدين جمبك و بيكلموك, اوك
ودنك معاهم, عينك على الطريق متسيبهوش
تاني هقول, ودنك معاهم, الكلام بيتسمع مبيتشافش
عينك متتشالش من على الطريق علشان الحادثة بتحصل فى لحظة

سابعا :متسافرش على طريق جديد مختصر لسه متسلمش من الحكومة علشان مش هتلاقى عليه اى خدمات ولا حتى شبكة تليفون.