مفاجأة من العيار التقيل| سمية الخشاب: قبل كده كنت عارفة انه مقلب لكن المرة دي معرفش

فجرت النجمة سمية الخشاب مفاجأة من العيار التقيل عن برنامج المقالب الذي يقدمه النجم رامز جلال كل عام، وذلك بعد عرض حلقتها مع النجمة أيتن عامر في النسخة الجديدة للبرنامج هذا العام والتي تحمل اسم “رامز جاب من الآخر”، مشيرة إلي أنها كانت تعلم ان هناك مقلب في الأعوام السابقة ولكن هذا العام لم تكن تعلم وتفاجأت بما فعله رامز معها في الحلقة.

جاء ذلك في بداية حديث النجمة سمية الخشاب في برنامج “تفاعلكم” عن المشاهد المحذوفة من حلقتها مع أيتن عامر، وقالت “هما قصوا كتير جدا ليا وأنا بقول رجلي بتوجعني وكتفي وجعني، ولحظة وقعتي كانت وقعة قوية بس هو قص كتير عشان ميبانش إن أنا اتصابت .. وأنا عندي تمزق في الأربطة في رجلي وكتفي ومش بعرف أحرك إيدي بإرتياح”.

وأضافت سمية الخشاب: “اللي يزعل إن ولا واحد منهم كجهة إنتاجية إتصل بالناس وقال سلامتكم أو  أسف، هو احنا في غابة يا جماعة؟ مش مهم الناس يحصلها إيه المهم أطلع أنور وأعمل مشاهدات عالية، المهم مصلحتي والباقي يتحرق، إيه اللي بيحصل ده دي مهزلة لا يمكن السكوت عليها، الناس تتأذي في صحتها، ما أنا عملتها معاه 4 سنين قبل كدة بس كنت عارفة إيه اللي بيحصل لكن المرة دي متقالش، عشان في تعمد للأذية يبقى انت كدة متعمد تأذي الناس، دي جريمة يعاقب عليها القانون. قالي إنه برنامج عادي فورمات”.

كما أوضحت سمية أن هناك العديد من الضيوف المصابين في البرنامج، قائلة: “أنا متأكدة إن في تعمد في الأذية والدليل إن مفيش حد إهتم إنني إتصابت، ولما روحت المستشفى قالولي إنتي مش أول حالة، إمبارح جالنا 3 حالات من عند رامز، أقل حد إتصاب حصله كدمات متعددة في جسمه، معقول إنتوا عارفين بتكسروا في الناس كل يوم ومكملين تصوير؟ وقال أصل الناس ماضية على إنهم موافقين على جميع الملابسات والظروف الخاصة بالبرنامج، يعني ايه؟ أنا موافقة إني أتكسر؟ أصلا مفيش عقد بيننا بس لو حتى فيه عقد، جسمنا ده مش ملكنا، ده ملك ربنا، فمش من حقك تأذي جسمي صحياً ونفسياً وعصبياً، فده ضد حقوق الانسان وضد القانون”.

وتابعت سمية الخشاب: “ساعة ما بتقعي مش بتحسي قوي بالوجع لكن بعدها حسيت بالوجع وكنت بعرج، رجلي الشمال مكنتش عارفة أدوس عليها، مبتلحقيش تاخدي نفسك في البرنامج كله مفاحآت وإنتي مش مستوعبة اللي حصلك، بعد ما خلص البرنامج قلتلهم رجلي وارمة وبعرج ومسنودة على صديقتي، رجعت الفندق قلتلهم ودوني المستشفى قالولي لا اصل مفيش حد. روحت المستشفى تاني يوم الصبح وعندي تقارير طبية مختومة وعندي كدمات متعددة وتمزق في الأربطة وكوارث لسه متعالجتش، أنا قعدت 10 أيام عشان أقدر أنزل وشلت الجبس عشان أرجع التصوير، وبدوس على رجلي لحد اللحظة دي رجلي ما زالت وارمة عشان متعالجتش، لو هتعالج هحط جبس ومش هعرف أصور المسلسل والمنتج هيروح في داهية انت متخيلة الموقف اللي أنا فيه”.

وأنهت سمية الخشاب حديثها قائلة: “أنا رفعت قضية قضية فعلاً ومن تاني يوم وأنا عاملة إجراء وفي طلب للنائب العام إن ينظر للموضوع، أنا متأكدة إن في ناس اتصابت ومش عايزين يقولوا عشان خايفين MBC تزعل منهم بس هي قناة محترمة وهي بتعرض البرنامج ومش الجهة المنتجة له، انا يعني صحتي دي محدش هيزعل عليها؟ كله إلا الأذية”.