محمد سامي يسعي للأوسكار بفيلم عالمي مع كاتب أمريكي.. ما القصة؟
كتب_جوهر الجمل
صرح المخرج محمد سامي خلال لقاء ببرنامج “أسرار” من تقديم أميرة بدر عبر قناة “النهار”، أنه يتمنى الحصول على جائزة الأوسكار وتقديم أعمال سينمائية مهمة، موضحاً أنه يعمل حالياً على فيلم عالمي.
وخلال اللقاء قال سامي: “نفسي أعمل فيلم مش تجاري بس بخاف، ونفسي أعمل مسلسلات مش تجارية وبخاف، السينما نفسي أعملها بأشكال كتير نفسي أعمل 20 نوع فيلم ويكون في رصيد سينمائي كبير، في فيلم مش مصري فيلم كونغولي بيتكلم عن بطل من الكونغو نفسي أعمله فيلم عالمي، وفي ناس بتساعدني من برا مصر مضيت معاهم وبنشتغل على الفيلم لكن هو هياخد وقت كبير في التحضيرات ويارب يصدقوا ونعمله”.
وتابع متحدثا عن فيلمه الجديد: “هو فيلم إنساني جدا قصة حقيقية وأخدت حقوقها وكتبت معالجة، ولجأت لكاتب أمريكي مش هقول مين لكن هو حاصل على الأوسكار، بيكتب الفيلم، وفي شركة إنتاج كانوا زاروا الوطن العربي وقعدوا مع قناة كبيرة وشافوا شغلي ورشحوني لمسلسل 6 حلقات مع شركة كبيرة جدا، لكن كان في حد تاني مرشح غيري وهو يستحق أكتر لأنه أنجح عالميا وكانت المقارنة ظالمة، الناس لما عرضت عليهم الفكرة كانوا متحمسين ومتشوقين إننا نشتغل سوا وعجبهم الموضوع”.
وأكمل محمد سامي، قائلاً: “أنا عايز أوصل العالمية بطريقتي وأقدم اللي بحبه ونفسي أخد الأوسكار، ربنا كبير جدا وجميل أنا عمري ما سألت ربنا مثلا أقوله أديني قسط المدرسة بتاع ولادي بقول يارب أديني 10 مليار دولار، ربنا سبحانه وتعالى يملك كل شيء ودايما بطلب منه أكبر حاجة”.
كما أوضح “سامي” أنه لا يعتبر نفسه محظوظاً في السينما وأنه ليس الأنجح فيها، قائلاً: “في السينما أنا مش الأنجح لما أعمل أفلام أحسن من اللي زمايلي عملوها، مش محظوظ أوي أنا لما نجحت في الدراما غبت عن السينما، مش عايز أرجع بأي أفلام عاوز أرجع بأفلام قوية، بحضر وماضي أكتر من حاجة، لكن دايما بتراجع وبخاف مش عايز أعمل حاجة اقل من اللي عملتها في الدراما وشايف إني أقدر أعمل سينما كويسة جداً، عملت أفلام كانت كويسة لكن مش أعظم أفلام بالنسبة ليا مع احترامي لكل منتجيها وصناعها وأبطالها لكن حاسس إني عندي أحسن بكتير”.
الجدير بالذكر أن المخرج محمد سامي يشارك في رمضان 2024 بمسلسل “نعمة الأفوكاتو” بطولة زوجته النجمة مي عمر.
