زمان وأنا صغير كان أبويا بيفصلى أغلب هدومي ، وكل مرة كنت افصل فيها طقم جديد كنت ألاحظ أنة دايما الخياط بيسيب مساحة من القماش كبيرة ومتنية من جوة الهدوم ، ولما كنت أسأل أبويا بكل برائة وأقولة ليه؟
كان يقولى يمكن تطول أو جسمك يتغير فنعرف نظبطه بعد كدة ، ولما كبرت ، بدأت اخد بالى من تفاصيل الهدوم الجاهزة ، مكنتش بلاقي المساحة دي فيها ولا حتة القماش الزيادة اللي هتسعفني لو الطقم ضاق او قصر عليا !
ف حياتنا ناس وعلاقات جميلة زي قماش التفصيل دة
علاقات مش بتبوظ لو اتغيرنا وكبرنا ، ومش بتتقطع ولا تتمزع لو اتفردنا فيها شوية أو شدناها ، علاقات بتسيب لينا مساحات للوقت والظروف ، تتحمل تغيرنا وتقلبنا وضيقنا واتساعنا ، علاقات هاند ميد
اتعملت بهدوء واتكونت بجهد وتعب
وفي ناس وعلاقات تانية زي الهدوم الجاهزة ، تبان شيك جدآ وعلى قد مقاسنا بالظبط ، بس مافيهاش سنتيمتر واحد زيادة برة حدودنا !
يدوب على قد الوقت والحالة اللي احنا فيها ، يوم ما هنتغير هتتفرتك وتتمزع !
كبرت وعرفت إن التفصيل أفضل مليون مرة من الجاهز ، وعرفت إن أبويا كان عندة حق ، وعرفت إني لازم أتعب ف تكوين العلاقات عشان تعيش ، وانتو كمان اتعبوا ف علاقاتكم وابذلوا فيها جهد ، وادوا فيها المساحة المستخبية عشان تقدر تتحمل التغيير
الخلاصة :- الجاهز بيليق عليك وعلى غيرك ، لكن التفصيل اتعمل علشانك إنت وبس ✋
