بقلم: د صلاح هاشم
لم يخلق الله وطناً للمصريين سوى مصر ..الأم اللذيذة ..الطيبة المجنونة القوية الحنينة..مفيش بلد في الدينا هيقدر يتحملنا ولا يسعنا غيرها ..ممكن نضايق منها بس بنحبها ما نتحملش فيها شكة إبرة ..بلد حبيب الكل . حتى النيل بالرغم من إنه بيعدى في ٣دول ..مصر واحده منهم ..بس العالم عرف النيل من مصر ..وحلاوة النيل في مصر شكل تانى خالص زى ما بيقول عبد الوهاب ..لدرجة إن اللى يدوق طعمه مره يستحيل أبدا ينساه .. بلد فيه كل المتناقضات اللى لا يمكن تركب مع بعضها في اى مكان في العالم ،لكن في مصر ركبت واديتنا صورة مبهرة عجيبة غريبة بتخطف قلبك وعقلك من أول نظرة ..دى مصر أم الدنيا وابوها وأخوها ..نموذج مصغر للدنيا بحلاوتها وتناقضاتها ..مفيش حد ممكن يزور مصر وما يرجعش ليها تاني ..معظم اللى زروها وشربوا من نيلها اصبحوا سفراء ليها بس بدون أجر ..بلد ساهم فى كتابة تاريخ العالم ..وطن شاهد على الدنيا واللي بيحصل فيها ..شعبها في رباط إلى يوم الدين ..وطول ما شعبها إيد واحده ماحدش هيقدر يكسرها ..مصر حقيقي بلد عصى على الانكسار والهزيمة ..العالم كله يطلع ينزل ومصر موجودة أبية عفية ثابتة نفسها ومكانتها محفوظة محدش يقدر يحركها ..ومها كانت الظروف والأحوال والأزمات هتفضل مصر عشان هي مصر ..والاسم واحده يكفي
