ناقد فني عن إعادة السقا لـ”سيدتي الجميلة”: الأزمة في الهروب من المسرح المصري

كتب : محمد علاء

أبدى الناقد الفني ضياء مصطفى في حوار له مع الانوار المصريه عن اعتراضه علي النقد الموجه للأعمال الفنيه قبل مشاهداتها واضاف أكيد أنا ضد أي حكم مسبق على الأعمال الفنية، بغض النظر عن توقعي، وإذا كان ده حق للجمهور، فمش حق للصحفيين ولا النقاد إنهم يصدوروا أحكام على أعمال فنية قبل المشاهدة، ونجاح أي متخصص هو تنحية توقعه قدر الإمكان قبل المشاهدة.

أنا عارف إن الإيفيه أحيانا بيحكم، وأنا أحيانا بقع في ده عادي، بس هو فكرة إعادة أعمال سابقة افتكاسة ولا حاجة جديدة عشان تبقى دي الأزمة.

وهل لازم نقارن السقا، اللي مقتنع بإن موهبته محدودة، بفؤاد المهندس، ما يمكن العمل يقدم نفسه بشكل مختلف وحلو ف نفس الوقت من غير ما يتفوق ولا يبقى منهزم قدام العمل القديم.

ثم ف الآخر ديه قصة عالمية ف الأساس مش بتاعة بهجت قمر يعني زيها زي مليون مسرحية تعتبر تيمات بتتعاد طول الوقت.

لو ف حاجة تستحق الهجوم، فهو اللي المفروض نجومنا اللي بقالهم 20 سنة معملوش مسرح من ساعة ما أغراهم نجاح السينما ولما وقعوا جريوا على التليفزيون.

وطول الوقت بيقولوا كلام مش حقيقي عن المسرح عشان يلاقوا مبرر لعدم تقديمه، وعشان كده احترمت دنيا سمير غانم اللي لما قررت تعمل مسرح عملت مسرحية في مصر ومش مجرد أسبوع وأجري لا بمواسم مسرح حقيقية زي ما متعودين طول عمرنا.

أخيرا ديه مسرحية لا معمولة لينا ولا هتتعرض ف مصر، وإن كان على المسرحية القديمة فهي موجودة، وإن كان على الجديدة فابن صاحب المسرحية الأصلية اللي عاملها، فده حقه القانوني.