لو أى ست قعدت فى اى قهوه بلدي هتستغرب ايه الحياه السخيفه اللى الرجاله بيحبوها دى !! مكان مش مهندم و مش شيك .. اغانى غريبة شغاله .. طلبات بسيطه و معموله بكروته .. الناس اللى قاعده 80% منهم مبيتكلموش .. -اتنين قصاد بعض بيلعبوا طاوله من غير ولا كلمه .. الشيشه فى ايد و الزهر ف الايد التانيه -اتنين تانيين بيلعبوا بلاى ستيشن على لاب توب مبينطقوش الا تعليقا على الجيم -اتنين اصحاب تانيين تحولوا لتماثيل شمع .. لازم تهزهم عشان تتأكد انهم عايشين -واحد قاعد مركب الهيد فونز بتاعته و عايش فى العالم بتاعه -اتنين صنايعيه واخدين راحه فى نص الشغل بيريحوا و ياكلوا من غير ما يكلموا بعض -ناس ببدل معاهم ورق بيبصوا فيه من سكات -ممكن تلاقى اللى عامل دوشه شلة شباب صغير فى الجامعه لسه مفرقتهمش الغربه و الجواز و الشغل .. صوتهم عالى و بيضحكوا من قلبهم و الاغرب ان اللي ساكتين الغامضين بيخرجوا من القهوه مرتاحين نفسيا جدا هم مش ساكتين عشان مش لاقيين مواضيع .. لا هم ساكتين عشان بيدوا فرصه للكركبه اللى فى دماغهم تخرج القهوة حياة بتخلي الحياة تكمل ❤
