*إوعي تمور الفتيس وانت علي منزل وترجع تعشقه تاني…ولا علي منزل ولا علي مطلع حتي.. حد يفك تعشيقة التروس ويرجع يعشقها وهيا بتلف بسرعة العربيه؟؟؟ دنتا لو قاصد تكسره مش هتعمل كده.. وبعدين كلمه في سرك العربيه ع المنازل بتوفر جدا في البنزين لو انت معشق غيار لو عاوز تعرف ليه أبقي أقولك 😉😉
*مفيش حاجه اسمها زيت مبيتغيرش حتي في الBMW بيتغير بس الفكره بيتحطله زيت إيه ومين بيغيره زي فتيس ال ZF بتاع ال BMW ليه ناس مخصوصه وبياخدوا دورات صيانه في أمريكا وألمانيا طب تخيل الكوري بقي🤔🤔 الالنترا كل فتيس ليه مواصفة زيت معينه ال HD مواصفته SP3 وبيتغير كل ٦٠ الف وبتغير فلتر وال MD مواصفته SP4 وبيتغير بعد ١٠٠ الف (او اقل) ومش بيتغير فلتر (لأنه فلتر داخلي بيتغير بعد اصلاحات الفتيس فقط).. وبعد كده غير علي ٦٠ الف.. ^^^ركز معايا بقي اوي في الحته دي👀… الزيت بيتغير والعربيه بارده !! العربيه ايييييه؟؟؟ بارده ٥ ساعات وبتحط الزيت الأصلي فقط او زيت ماركه محترمه مواصفته sp3 او sp4..المهم اوعي بأي حال من الاحوال تحط زيت مواصفه غير دول..(الناس اللي بتحط زيت موبيل ٣٢٠ لو شوفتك ها*****🙊)
*إوعي تدي غيار P او R والعربيه لسه بتتحرك حتي لو بسرعه ١ كم/س لازم تبقي دايس فرامل والعجل واقف تماماً كأن تحت العجل قطه نايمه..
*وانت واقف في إشاره أو الطريق ماشي بطئ متقعدش تمور وبعدين تنقل D خاااالص.. انت تفضل علي ال D دايس فرامل لمده ٢٠ ثانيه مثلاً لما تقف وبعدين سيب فرامل وإمشي لو طولت عن كده مور لكن تقعد تدي D في N كل ٢ متر حراااااااااام … الفتيس لو ليه خدود كان لطم..
* لو عندك ستيبترونيك كل فتره والتانيه امشي عليه وشغله عشان العضو الذي لا يستخدم يضمر ويضمحل 😄
*والله العظيم العربيات الأوتوماتيك مينفعش تتقطر خالص خالص نوهااااائي أخرك ٥٠٠ متر او كيلو بالكتير اوي علي سرعة ١٥كم/س … المفاجأه بقي العربيات الأوتوماتيك مينفعش تتقطر حتي لو دايره..(شايفك ياللي بتشكك فيا…الدليل موجود بس انت قول جزر)😎
*طالبه معاك ترزع kick down متحرمش نفسك من حاجه مره مرتين ماشي بس مش سبهللة هي كل شويه…انت مش راكب فيراري..🚗
* أخر حاجه بقي عشان صوباعي واجعني😂😂 أما تركن شد الهاند بريك الأول وبعدين عشق الفتيس ع ال P عشان تحميل الوزن يبقي ع الفرامل مش الفتيس..
